ما نغصبْها !! اللى قرَّرت ما اتريدنى نقربْها !!
طريق السلامة باي ... ما نغصبْها
اللى قررت هجرانى ! ومسحت اسمايا وكنيتي وعنواني
وبالشمع الأحمـــر شمَّعت بيبانى
قرَّرت نــــــــا بالصـــادقة نشطبْها
وانغيَّر ادمايا الجـــارية افـ شرياني
وانفاس من روحــي الـها نسحبْها
اللى قررت فجـــــأه اتهون حناني
ماعاد نيَّه افـ داخــــــــلى ترغبْهـا
وقرَّرت نــــــا ندفن غـــرام زماني
واجروح منـــــــــها دامية انطبَّبْهـا
وما عاد نسمــــح بالوجيعة ثانــي
ولا عاد كيسان الغــــــلا نشربْهــا
هيَّا حُرَّ ة
اللى قررت مــــــــا اتريد ليَّا جُرَّه
وما عاد تبى سيــــــرتى بالمــرة
طريق السلامة اتشيلها تصحبْها
اللى جوَّرت عالعمــر جابت شرَّه
قرَّرت نــــــا من داخلى انسيَّبْها
وما عاد نقــسَى عالكنين انضرَّه
ولا اندير غـــــــيَّه دنيتي تقلبْها
ونشري افـراح العمر بلاها انسرَّه
ونردم مواجــــــع قاسية انغيَّبْها
ونرتاح من جَــــــــوْ الغرام وحَرَّه
وانبيع دنــــيا ابـ ظلمها نِحْجبْها