مجرودة ليبية

كيف حالكم يا اعضاء منتدى جروح البادية
إنشاء الله تكونوا بخير
احترت لكم مجرودة ليبيه ان شاء الله تعجبكم
مرحب يـا بـوعين رغيبة ... ونزيد نرحب ترحيبة ... عاللي كـافـاني بحنان
عاللي كافـتـني بالـغيـة ... قتلها مرحب بالجيـة ... وانتِ اللي مكتوبـه ليـا ... نصدر فيك اليوم بيان
ياللي صادر بحكم غيابه ... سبع شهور وزاد عذابه ... خلاني نجني في اتـعابه ... غير غلاها ما ينهان
غير غلاها يعـز علي ... غير غلاها صافي النـية ... غير غلاها موش شوية ... شايط ناره في الوجدان
شايط ناره من الزينات ... ومن ريدي سمح المشيات ... اللي فيه عيون وسيعات ... تاعب منهن يا لخوان
تاعب من نظرات عجيبة ... اللي ما لقيتلهن تطبيبة ... وين بعد انزاح سريبه... حتي من بيت الجيران
حتي طلتها يالايا ... تصبح وتمسي بغنايا ... طلتها تبريلي دايا ... وتجلي هبات أحزان
وتجلي كل اللي صاير ... ما عاد عندي ليك دباير ... قعدت بعد غيابك حاير ... راني مزايف ديمان
راني مزايف سكناها ... براك الشاطي من غرباها ... حرف الزين أول مبداها ... مكان الغالي يا شجعان
مكان الغالي يعز علي ... واخد قدره في مكنية ... نمشيله في كل عشية ... وانا ما نقدر عـ النسيان
وانا ما نقدر عالتبريحة ... خوكم راه يبي النصيحة ... خايف يديرله شي فضيحة ... تبدا مكتوبه عنوان
مكتوبه بعنوان الخاين ... هو اللي قدامي باين ... ما هو كيف وليش وكاين ... نبدا فـ تاريخي ندمان
تبدا فـ تاريخي شهيرة ... نبي ننسي هالتكديرة ... نبي نقعد في زغريرة ... ديما متكيف فرحان
متكيف فرحان معاها ... ريدي وين يقولوا سماها ... يهج القلب يجي يالاها ... ما في كيفه في النسوان
ما في كيفه يفهم قولي ... ساعة فــ وقت العقل تجولي ... نقتل كان عرب وقفولي ... حبك ساكن في الكيان
حبك ساكن في مكانه ... قدره من ربي سبحانه ... جاني اليوم وتم لقانا ... صدفة ما هي في الحسبان
صدفة ما خطرت في بالي ... لين وقف صبا في قبالي ... بعد غياب سنين الغالي ... مذكر ما هو نسيان
مذكر جاني متغير ... تو كبير زمان صغير ... فكره عن بالي ما غير ... جماله في الزايد مزيـان
جماله كيف نوصف تعبيره ... فيه خد وعيون كبيرة ... والسالف يا زين ظفيرة ... كيف سلاسل هالسجان
كيف نوصف نقول شوية ... فيها قلب يصب حنية ... فيها أوصاف من الحورية ... غير الفارق في السيقان
غير الفارق هي ميجودة ... افخيالي ما هي مفقودة ... والحورية قصة مسرودة .. تلاشت من قديم زمان
تلاشت ولا من يسال عليها ... ومنايا ربي عاطيها ... سالف حر بلون مياميها ... الله يحفظها من المعيان

شكر لكم

صح نبضك وسلم احساسك
الله يعطيك العافيه
تحيتي